तेलङ्गाना

तेलङ्गाना क्षेत्र धेकौन्या नक्सा, जिल्ला ओणा सहित भारत

तेलङ्गाना (तेलुगु : తెలంగాణ, तेलंगाणा), भारत को आन्ध्र प्रदेश राज्य बठेइ छुटीबर बन्याऽ भारत को नौलो राज्य हो। हैदराबाद लाई दश बर्ष सम्म खिलाइ तेलङ्गाना रे आन्ध्र प्रदेश को संयुक्त राजधानी बनौन्या प्रस्ताव अरीरैछ। यो भारत को हैदराबाद नामक राजवाडाअन को तेलुगुभाषी क्षेत्रअन मिलीबर बनीरैछ। 'तेलंगाना' आँखर को अर्थ हुन्छ - 'तेलुगुभाषीइन कि भूमि'।

५ डिसेम्बर २०१३ का दिन मन्त्रीसमूह हताँ बनाईयाऽ ड्राफ्ट बिल लाई क्याबिनेट ले मन्जुरी प्रदान अरीसकिराइछ। १८ फेब्रुअरी २०१४ मी तेलङ्गाना बिल लोक सभा बठेइ पास भयो तथा दुई दिन पछा येई लाई राज्‍य सभा बठेइ मन्जुरी दिइयो। राष्ट्रपति को दस्तखत सङ्ङै तेलंगाना औपचारिक रूप मी भारत को २९वाँ राज्य बन्यो। लोक सभा बठैइ बिल लाई पास अरौन्या बेला मी हंगामा हुन्या कारण ले लोक सभा टेलिभिजन को प्रसारण रोक्दु पण्याऽ थ्यो।

अइल जै क्षेत्र लाई तेलङ्गाना भणीन्छ, तई मी आन्ध्र प्रदेश का २३ जिल्ला मध्ये १० जिल्ला पड्‍डान। तन हुन्: हैदराबाद, अदिलाबाद, खम्मम, करीमनगर, महबूबनगर, मेडक, नलगोंडा, निजामाबाद, रंगारेड्‍डी तथा वारंगल । येई क्षेत्र बठेइ आंध्र प्रदेश को २९४ मध्ये ११९ विधानसभा सिट रैर्‍यान। तेलंगाना लाई ४२ लोकसभा सिट मध्ये १७ सिट प्राप्त होइरैछ।

इतिहास

तेलङ्गाना लाई यक जुदोइ राज्य बनाउन्या माग पैली बठेइ अरीनोइ आइरैथ्यो, रे येइ खिलाइ समय समय मी आन्दोलन लै हुनाइ आइरैथ्या। छाड्‍डीचाःल येइलाई २ जून २०१४ नौलो राज्य घोषणा अरीयो।

धर्म और भाषा

तेलङ्गाना को जनसंख्या ८४% हिन्दू, १२.४% मुसलमान रे ३.२% सिख, ईसाइ रे अन्य धर्म का अनुयायी रयाऽ छ। तेलङ्गाना का ७६% समुदायका मान्सुन तेलुगु भाषा बोल्लान। १२% मान्स उर्दू तथा १२% मान्स अन्य भाषा बोल्लान।